Сексистички објави од медиуми: Хелсиншки комитет поднесе претставки
Објавено во: Македонија 16 Септември, 2019
Сексистички објави и извор на вознемирувачки и мизогини изјави - Хелсиншкиот комитет тврди дека некои медиуми објавуваат текстови со ваква содржина кои вознемируваат врз основа на пол и род. Комитетот поднесе претставки до Советот за етика во медиумите против порталите expres.mk и vistina.com.mk, за текстовите во кои се коментира составот на кабинетот на новата министерка за финансии.
По неприфатливите изјави на портпаролот на ВМРО ДПМНЕ при изборот на Нина Ангеловска, овие медиуми пласираат омаловажувачки коментари за Ана Марија Макеска, координаторка за социјални медиуми и односи со јавност во Министерството за финансии. Коментирајќи го нејзиниот физички изглед со намера да ја дискредитираат нејзината професионалност, вршат дискриминација кон сите жени омаловажувајќи ги нивните работни способности. Најостро ги осудуваме ваквите известувања и создавање на текстови и изјави кои жените ги ставаат во подредена позиција и го повредуваат начелото на рамноправност помеѓу мажот и жената. Ја повикуваме Комисијата за спречување и заштита од дискриминација, согласно своите законски овластувања да поведе постапка за заштита од дискриминација по службена должност и да утврди вознемирување врз основа на пол и род, стои во известувањето.