Села ќе оди на избори, но прво да се гласа СЈО
Објавено во: Македонија 26 Април, 2017
Пратеникот Зијадин Села од Алијанса на Албанците, денеска ги повика пратениците од ВМРО-ДПМНЕ да гласаат за продолжување на мандатот на Специјалното јавно обвинителство и за специјален суд, а тој потоа ќе гласа за нови предвремени избори.
Тој им порача на пратениците на ВМРО-ДПМНЕ дека е очигледно дека напаѓаат нешто што постоело и кога била ВМРО-ДПМНЕ на власт, алудирајќи на платформата.
„Ние Албанците имаме израз: Како ќе се обратиш на планината, така ќе ти врати. Се кажуваше и за платформа и за суверените. Платформата постоеше и кога вие имавте мандат, сега само сакате да ја избегнете одговорноста. Јас не сум од политичарите кои на своите деца сакаат да им остават иднина на мито и на корупција. Затоа, вашиот предлог за предвремени избори го прифаќам. Но, дали сте сигурни дека вашиот претседател Иванов нема да ги игра истите игри со недавање мандат. Ајде да го разрешиме во Парламентот. Нека бидат и локални и парламентарни избори истовремено, ама ајде првин да гласаме за СЈО со двотретинско мнозинство, за специјален суд, па да одиме на предвремени избори. Јас ќе гласам, прашајте го вашиот претседател и кажете“ – изјави Села.
На оваа прозивка му одговори Крсто Јовановски од ВМРО-ДПМНЕ.
„Колега Села, јас ќе ви одговорам исто така со поговорка. Како си сеел, така ќе жнееш… Ти, колега, кажа дека знамето и химната не важат за тебе, каков однос од нас сакаш? Ти го споменуваш СЈО, совршено добро знаеш што е СЈО. Претседателот Груевски и оној кој вие фикус го нарекувате, им побара на СДСМ да се откажат од платформата и ќе добијат поддршка за малцинска влада, понуди потоа, ако сака, сите од ВМРО-ДМНЕ да ги носи во затвор. Не е во прашање омраза наша спрема вас, туку дали сме подготвени да имаме соживот, колега Села“ – рече Јованоски.
Денеска е 19-то продолжение на конститутивната седница во Собранието.