Село кое 25 години е под вода, сега ќе се појави
Објавено во: Свет 23 Јуни, 2020
Средновековно село, потопено пред 25 години, можеби повторно ќе излезе на површина.
Станува збор за селото Фабриче ди Карегина во Италија, кое потекнува од 12. век.
Оваа средновековна населба имала свои жители сè до 20. век. Се наоѓа во областа Тоскана, а првпат е евакуирана и намерно поплавена во 1946 година, при изградба на хидроелектричната брана на вештачкото езеро Ваљи. Половина век подоцна, тоа целото потонало.
Потонати под 34 милиони кубни метри вода, скоро непроменетите градби и зданија на напуштеното село, вклучувајќи камени куќи, мост, гробишта, како и црквата Сан Теодоро, сè уште се гледаат, но само кога браната се празни поради одржување.
Ова се случило само четирипати откако селото било поплавено – во 1958, 1974, 1983 и 1994 година.
Езерото денес има улога на резервоар за вода во случај на пожар. Властите веќе неколку години се обидуваат да го испразнат езерото и да го вратат уништеното село на површина.