Семејството на Саздовски бара да им бидат потврдени 19-годишните казни на убијците

Добивај вести на Viber

Семејството на Никола Саздовски бара да им бидат потврдени 19-годишните казни затвор на сторителите на убиството. 

Семејството и претставници на навивачката група „Комити“, денеска до Јавното обвинителство поднесоа жалба поради намалувањето на казните на извршителите на убиството од 19 на 16 години затвор.

„Максималната казна за ова дело е доживотен затвор, но за лица помали од 21 година, односно доколку извршителите немаат 21 година во време на извршување на делото не можат да бидат осудени повеќе од 20 години. Зарем тоа не е доволно олеснителен момент за овие лица. Биле млади, зарем Никола беше стар? Зарем се двоиме во Република Македонија на млади и стари. Не, тоа не би требало да биде така. Затоа ние овдека дојдовме да изразиме еден мирен протест и револт. Доставивме на јавниот обвинител едно барање да го продолжи процесот да бара максимална казна од третостепениот суд, односно од Врховниот суд и се надеваме дека Врховниот суд тоа ќе го усвои, односно да ја потврди онаа 19-годишна казна што ја изрече првостепениот суд“, изјави таткото Тони Саздовски по поднесувањето на жалбата.

Саздовски почина по претепувањето на 29 јуни 2018 година.  За свирепото убиство  се осудени Бесир Беља и Скендер Демири на по 19 години затвор.