Сериски убиец од Струмица доби доживотен затвор
Објавено во: Македонија 22 Октомври, 2020
Сериски убиец од Струмица е осуден на доживотен затвор.
Марјанчо Велев(55) од селото Добрејци кој беше обвинет за две убиства извршени речиси на идентичен начин доби доживотен затвор.
Основниот суд во Струмица денеска го осуди за убиството на струмичанецот Александар Мицев, чие тело исто како и на Ристо Иљашев беше пронајдено во водите на браната Турија.
Велев убиство го извршил на 9 октомври во 2018 година при што од зад грб пукал со огнено оружје со два куршуми во главата на Мицев, чие тело беше пронајдено на 5 август лани.
Во образложението на пресудата стои дека е применет член 44 од Казнениот закон за утврдување единствена казна затвор од доживотен затвор, бидејќи осудениот најпрвин го убил Мицев, а потоа и вториот струмичанец, Ристо Иљашев.
На почетокот од судењето кое започна на 7 овој месец обвинетиот Велев пред судот се изјасни дека не се чувствува виновен за делото за кое е обвинет.
Во февруари годинава судот во Струмица на Марјанчо Велев му изрече казна затвор од 20 години за убиството на струмичанецот Ристо Иљашев чие тело беше пронајдено во метално буре во браната Турија.