Шефицата на ММФ им се „наостри“ на криптовалутите
Објавено во: Економија 14 Март, 2018
Кристин Лагард, директорката на Меѓународниот монетарен фонд, ќе ја прифати агендата на претстојниот Г20 Самит на кој во фокусот на вниманието од економските теми ќе бидат криптовалутите и спречувањето истите да се користат за перење пари и финансиски криминал.
Според Лагард потребна е пообемна и поквалитетна соработка меѓу владините тела и централните банки со цел да се најде соодветна регулатива за употребата на криптовалутите.
Технологијата која се крие зад криптовалутите, вклучувајќи го блокчејнот, нуди возбудливи достигнувања кои, според неа, можат да го унапредот степенот на финансиска вклученост, особено во земјите со ниски примања каде милиони луѓе не поседуваат традиционални банкарски сметки.
„Меѓутоа, пред да стигнеме до тоа, потребно е да направиме чекор наназад и да ги согледаме ризиците кои доаѓаат со она што таа технологија го ветува“, напиша Лагард на својот блог пред средбата на министрите за финансии од Г20 следната недела, пренесува Ројтерс.
„Ваквите дигитални понуди се обично составени на децентрализиран начин и без потреба од една централна банка, шт на трансакциите во криптовалути им овозможува елемент на анонимност, во голема мера сличен на готовинската трансакција“, смета Лагард.
Исто така претходно Јапонија наведе дека регулирањето на криптовалутите и нивното учество во финансискиот криминал ќе биде нивна главна определба на Г20 Самитот за што побараа поширока поддршка.