Шекеринска ќе бара отштета од човекот кој ја нападна во Собранието

Добивај вести на Viber

Кривичниот суд денеска за 6 октомври го одложи судењето за Панче Ангелов, напаѓачот на Радмила Шекеринска кој ја нападна во Собранието на 27 април годинава.  

Во судницата беше присутна и Шекеринска која побара отштета, а за висината дополнително ќе се произнесе.

„Насилството не се исплаќа, насилството се казнува. Бевме стрпливи овие неколку месеци, иако не беше лесно. Ако е ова само дополнително чекање, не мислам дека е проблем. Верувам во правото на секој обвинет да има адвокатска помош“ - вели Шекеринска.

Адвокатот на обвинетиот, Драган Пешевски, побара од судот да се одложи рочиштето затоа што според она што го видел од записниците, неговиот клиент бил правно неук, па морал дополнително правно да го посоветува. 

„Од она што го видов во записниците во истрагата, тој е правно неук, па затоа барам судот да ми даде време правно да го советувам, бидејќи согласно Уставот има право на одбрана. Морам да напоменам дека денеска со обвинетиот за прв пат се видовме во судница“ - рече адвокатот Пешевски.

Обвинението за кривичното дело насилство  обвинителството го поднесе во август.

За ова дело предвидена е казна затвор од три до десет години.