Шекеринска: Ќе набавиме 150 возила за лесна пешадија од САД
Објавено во: Економија 30 Ноември, 2019
Радмила Шекеринска, министерката за одбрана, во синоќешното интервју во емисијата 360 Степени на Алсат потврди дека Македонија, согласно планот за модернизација на македонската армија, за 5 години треба да се спроведе набавка на околу 150 возила и оклопни транспортери од САД за лесната пешадија.
Шекеринска рече дека купувањето ќе оди преку договор влада со влада и дека тоа нема да биде комерцијална набавка. Првиот проект лесни оклопни возила на тркала чека завршување на процедурата на договорот од американската страна.
- Тоа е договор за декларираните единици кои се на располагање во секој момент. Тоа го предвидува и уредбата која Владата ја усвои пред неколку месеци. Очекувам до крајот на годината да го имаме договорот и ќе ја имаме првата исплата заедно со средствата кои што ги чуваме за исплата за новиот простор во НАТО, рече Шекеринска.
Шекеринска спомена дека се чуваат 20 милиони евра за исплати за потребите за членувањето на Македонија во НАТО до крајот на годината, од кои 11 милиони евра ќе биде првата рата што ќе се плати за оклопните возила и транспортери.
„Според нашиот долгорочен план за развој на одбранбените способности, пресметувавме некаде 150 милиони евра во период од повеќе години. Тоа е некаде помеѓу 10 и 15 милиони евра на годишно ниво. Во рамки на овие 150 милиони, 30 милиони ќе бидат донација од САД“, вели Шекеринска.
Во донацијата, покрај неповратниот грант од САД за оклопни возила, истиот ќе вклучува и дополнителна опрема за лесната пешадија.