Шекеринска: Лага е дека на Криволак се користи осиромашен ураниум
Објавено во: Македонија 18 Август, 2018
Министерката за одбрана, Радмила Шекеринска изјави денеска дека во Македонија и надвор од земјата „постојат структури кои не сакаат Македонија да стане пристојно место за живеење, кои не сакаат Македонија финално да се стабилизира, и кои не сакаат да стане членка на НАТО и членка на ЕУ и затоа шират дезинформации.
Шекеринска ова го изјави на денешниот Отворен ден со АРМ, демантирајќи ги информациите во дел од медиумите дека на воениот полигон Криволак се користи муниција со осиромашен ураниум.
„Лага е дека на Криволак се користи осиромашен ураниум и неодговорно е и антидржавно и срамно што некој се обидува да ја злоупотреби. Најостро и најдецидно ја демантирам дезинформацијата со којашто сакаат граѓаните да се уплашат“- вели Шекеринска.
Откако започнаа НАТО обуките и тренинзи на полигонот, во неготинско главна тема е стравот од наводно зрачење од муницијата којашто се користи, и на социјалните мрежи се бараат одговори што точно ќе се случува во иднина во Криволак, и дали навистина како што се шпекулира, се очекува доаѓање и сместување на околу 3.000 американски војници.Министерката додава дека треба да се прекине со разни теории на заговор и заплашување на населението, и смирува дека нема место за страв од непознатото. Околу гласините дека ќе се поставуваат контејнери за сместување на 3.000 НАТО војници во Криволак, вели дека дури и да сакаат, тоа не е изводливо, бидејќи полигонот нема толкав капацитет.