Шекеринска побара од судот да му достави покана на Милошоски додека е в болница
Објавено во: Македонија 03 Јули, 2020
Вицепремиерката Радмила Шекеринска побара од судот да му ја врачи поканата за рочиште на Антонио Милошоски додека долгогодишниот пратеник на ВМРО-ДПМНЕ е на Клиниката за инфективни болести.
Милошоски на крајот на јуни објави дека ќе биде во изолација со престој во болница откако бил во претходен контакт со својата мајка, инаку позитивна на Ковид-19. Последно што објави поранешниот министер за надворешни работи е дека вториот лабораториски наод од земен брис е негативен и дека овие неколку денови ќе закрепнува.
-Јас не можам да сфатам како може еден кандидат за пратеник во нашава изборна единица Антонио Милошоски да не е достапен за судските органи да прими покана за суд. Знаете што ќе се случуваше. Тој е сега во изолација нели. Па може сега да го најдат полесно. Ама пазете партијата која денес зборува дека ќе ја обновеле правната држава нејзините луѓе не одат на суд, не се појавуваат, бегаат. Некој од нас тоа да го направеше секој ден сам за тоа ќе зборуваа, рече Шекеринска.
Таа ова го кажа во разговор за ТВ Тера во Битола, коментирајќи го новиот закон за ЈО, како и постојаните опструкции со кои се соочуваше правосудството во изминатите години.
Инаку Милошоски претходно тврдеше дека поканата тој уредно ја примил и е политички спорна затоа што иако за тој случај истрагата траела со години таа е испратена на два дена предоргиналниот датум за предвремени избори 12 април.