Шеќеринска: Армијата да биде забрането место за сите политички партии

Добивај вести на Viber

Армијата да биде забрането место за сите политички партии, вклучително и за партијата од којашто доаѓам, изјави министерката за одбрана, Радмила Шекеринска. 

Таа денеска се сретна со началникот на АРМ, генерал потполковник Методија Величковски, со кој најавија добра, квалитетна и успешна соработка во периодот што следува.

„Тука сум за да се вратиме на нашата определба за членство во алијансата, за да направиме вистински реформи што ќе бидат корисни за сите. Силно ќе се залагам за зголемување на буџетот на АРМ и подобрување на професионализацијата во неа. Армијата да биде забрането место за сите политички партии, вклучително и за партијата од којашто доаѓам“- изјави Шекеринска.

Генералот Величковски упати честитки до министерката за нејзиното поставување и додаде дека се радува што влијателна личност е на чело на Министерството за одбрана со надеж дека тоа влијание ќе биде искористено за подобрување на состојбата во армијата.

„Се радувам што Министерството добива влијателен министер. Армијата секогаш ќе биде поддршка на Министерството за одбрана и очекувам така да биде и обратно. Воедно во периодот што следува ќе имаме можност за размена на идеи корисни за армијата, а со тоа и за безбедноста на државата“- вели  Величковски.

Шекеринска зборуваше за опрема, униформа, чизми за армијата, и додаде дека ќе сторат сè за да најдат решенија за искористување на домашните компании, што ќе влијае и на подигнување на домашната економија.