Шилегов самоиницијативно поднесе барање до Антикорупциска да ја испита набавката на противпожарната дигалка од 1,7 милиони евра
Објавено во: Македонија 04 Мај, 2021
Скопскиот градоначалник Петре Шилегов самоиницијативно до Државната комисија за спречување на корупција поднесе писмено барање да ја испита вредноста и начинот на јавната набавка од 1,7 милиони евра на противпожарната дигалка.
Вчера лидерот на ВМРО-ДПМНЕ, Христијан Мицкоски, го обвини Шилегов дека купил противпожарна дигалка која е многу скапа и дека соучесник на операторот-набавувач од Будимпшета е фирма на зет на член на градската управа.
„Градоначалникот Шилегов денеска се обрати до Државната комисија за спречување на корупцијата со барање за испитување на наводните сомнежи за постоење корупција и судир на интереси при реализација на набавката на специјализираното возило - противпожарна скала, која претставува единствена опрема од ваков тип на Бригадата за противпожарна заштита на Град Скопје.
Со цел спречување на ширењето лажни вести и дезинформирање на јавноста, побаравме од ДКСК, преку своите механизми, да спроведе постапка за утврдување на наводните нерегуларности и на тој начин да ги информираме граѓаните на Скопје за уредноста на постапката при набавката на ваквата противпожарна скала“ истакна градоначалникот Шилегов.
Од Град Скопје додаваат дека се работи за софистицирана опрема со која може да се интервенира на објекти кои имаат повеќе од 5 ката и дека набавката е спроведена низ високо транспарентна постапка на меѓународен тендер кој траеше 6 месеци.