ШКОТИТЕ НЕ СЕ „УГНЕТЕН НАРОД“ : Тежок удар за Шкотска, нема право на референдум за независност без дозвола на Лондон

Добивај вести на Viber

Шкотска нема право да организира нов референдум за независност без дозвола на Лондон, одлучи Врховниот суд на Велика Британија, со што му зададе удар на сепаратистичкото движење. Шкотската прва министерка Никола Старџен, која се залага за ново гласање за независност, рече дека „шкотската демократија нема да биде замолчена“.

Нејзината влада не е задоволна од излегувањето на Велика Британија од Европската унија и сака Шкотите повторно да гласаат за независност во октомври 2023 година. На ова се спротивставува британскиот премиер Риши Сунак, чија влада посочува дека референдумот во 2014 година, на кој 55 отсто од Шкотите гласаа за останување во Обединетото Кралство, е последното гласање на оваа генерација. Анкетите генерално покажуваат дека Шкотите се поделени на половина за тоа дали ја поддржуваат независноста.

Затоа Единбург побара дозвола од судот да распише референдум самостојно, без дозвола на британските институции, што судот го одби.

„Законски одржан референдум би имал важни политички последици за Обединетото Кралство“, напиша главниот судија Роберт Рид и рече дека само британскиот парламент може да одлучи за ова прашање. Интересно е што судот го отфрли аргументот на владејачките шкотски националисти кои сакаат референдумот да се одржи под правото на самоопределување според меѓународното право, бидејќи Шкотите не се „угнетен“ народ.