ШТО Е СТАГФЛАЦИЈА И КОЛКУ ВЛАСТИТЕ ГО СФАТИЈА СЕРИОЗНО ПРЕДУПРЕДУВАЊЕТО ОД СВЕТСКА БАНКА - еве кои се препораките на економските аналитичари
Објавено во: Финансии 06 Октомври, 2022
Светска банка во својот најнов извештај предупреди дека економијата на земјава може да влезе во фаза на стагфлација. Во тој документ за следните неколку години се предвидува низок раст, а енергетската криза, високата инфлација и војната во Украина ќе бидат причина за стапките на економска активност да изнесуваат 2,1 отсто оваа година, в година тој да биде 2,7 отсто и во с024 да достигне само 2,9 проценти. Но, инфлацијата ќе биде многу висока и тоа 12,3 отсто годинава, в година 5,9 проценти и спуштање дури во 2024 година за кога се предвидува стапка од 2,6 отсто.
Според светските банкари, треба да се спроведат реформите, а политичките напори да се фокусираат на враќање на фискалната и финансиската одржливост.
„Додека се заканува опасност од стагфлација, државата мора да почне да ги спроведува ветувањата за реформи кои можат да го оживеат моментумот на потенцијалниот раст на среден рок. Политичките напори мора да бидат насочени кон враќање на фискалната и финансиската стабилност, истовремено градејќи социјална отпорност и клима што ќе ја намали ранливоста на земјата од шокови и ќе ги обнови долгорочните изгледи за економски раст“, наведуваат од Светска банка.
Според економските аналитичари, стагфлација е намалување на економската активност, и во исто време висока инфлација. Според нивв, уште не сме во фаза на стагфлација, но одиме во тој правец, па затоа сметаат дека треба да се внимава на јавниот долг, да се штеди, и да се бараат алтернативи за наоѓање поевтина електрична енергија.