Што и го „качи шеќерот“ на скопска „Европа“?

Добивај вести на Viber

Кратење на производните трошоци, касапење на финансиските расходи паралелно со зголемените приходи од продажба и растечки финансиски приходи дадоа резултат- „Европа“ со новиот менаџмент по една година има профит од 1,1 милиони евра и тој книжи раст од феноменални 730 отсто!

Скопската кондиторска индустрија „Европа“ го има еден од најдобрите полугодишни извештаи во последниве неколку години. За првите шест месеци годинава оваа компанија оствари профит од 1,1 милиони евра, покажуваат официјалните податоци од билансот на успех на оваа компанија.  „Европа“ успеa со раст на приходите од продажба од 16 милиони денари да оствари раст на профитот од 56 милиони евра. Како ? Со редукција на трошоците и со раст на финаниските приходи.

Каква е крвната слика?

„Европа“ до крајот на јуни има приходи од продажба кои достигнуваат речиси 5,8 милиони евра што е за 5 отсто подобро од лани односно за 260.000 евра. Значен раст имаат приходите од домашен пазар кои достигнале 2,8 милиони евра и пораснале за 19 отсто. Извозот носи околу 3 милиони евра и книжи пад од подносливи 5 отсто во споредба со лани. 

За подобрената крвна слика многу е значаен падот на оперативните расходи на компанијата. Тие се за околу 360.000 евра пониски од истиот период лани и изнесуваат 4,75 милиони евра. Најзначен пад има кај најголемата ставка – трошоците за суровини и други материјали кои изнесуваат 2,6 милиони евра и се за 600.000 евра пониски од истиот период лани. Единствено раст бележат останатите расходи на компанијата и тие изнесуваат 320.000 евра што е за речиси 9 пати повеќе од истиот период лани.

По удирањето на цртката излегува дека оперативната добивка е значајно над еден милион евра односно поточно 64,4 милиони денари и тоа е 3 пати повеќе од истиот период лани.

Значајна стимулација има и кај финансиските приходи и финансиските расходи. Имено приходите од финансирање се за 150.000 евра повисоки од истиот период лани и тие изнесуваат над 200.000 евра. Паралелно со тоа менаџментот на  компанијата ги скратил значајно финансиските расходи до ниво од 32.400 евра што е за 240.000 евра помалку од истиот период лани односно за 88 отсто помалку.

На крај епилогот е логичен. Нето добивката на „Европа“ е 1,1 милиони евра за половина година и таа е за 850.000 евра повисока од истиот период лани.