Што има ВМРО-ДПМНЕ во „ракавот“ за Рекет, а јавноста не го знае

Добивај вести на Viber

Опозициската ВМРО-ДПМНЕ повторно се заканува дека доколку судот не ја истражи одлучно аферата „Рекет“, тие ќе ги објават во јавноста своите сознанија што ги имаат за овој случај.

Александар Николоски, потпретседател на ВМРО-ДПМНЕ, во утринското гостување на Алфа телевизија, нагласи дека ако судот не ја заврши својата работа околу случајот со СЈО и „Рекет“, тогаш ВМРО-ДПМНЕ ќе објави нови сознанија за тој случај.

„СЈО со торбата Луј Витон полна со милион евра одамна е завршена приказна. СЈО фактички и не постои. А, во однос на работите што се случувале таму, а ова што сега го гледаме како судски процес, е само врвот на ледената санта. Допрва ќе излегуваат десетици и десетици работи. А, ние оставаме на судот да проба тоа да го истражи и имаме многу сознанија. Доколку го истражи одлично, доколку не, ќе одиме во јавност со тие сознанија“, нагласи Николоски.

Тој се надева дека по 12-ти април ќе има едно ослободено и релаксирано судство и обвинителство, кое нема да работи под дневно-политички притисок на врвот на власта.

Вели дека е добро да се донесе закон за јавно обвинителство.

„Добро е да се донесе закон за ЈО, затоа што е жива материја, се менуваат работите треба прилагодување итн. Тоа е едно од барањата на земјите членки на ЕУ со цел Македонија конечно да почне преговори за членство со ЕУ. Затоа што Заев ја лажеше јавноста дека е доволно да го смени името и рајските порти ќе се отворат и мед и млеко ќе тече во Македонија. И дека ќе не седнат до Франција и Германија во ЕУ“, вели Николовски.

Пред неколку месеци и лидерот на ВМРО-ДПМНЕ, Христијан Мицкоски реше дека тие имаат сознанија за рекет, и дека партијата ќе ги објави доколку не се води правилно судската постапка.