Што ја урна турската лира?
Објавено во: Економија 10 Август, 2018
Турската лира доживеа драматичен пад.
Оваа валута почна да опаѓа на рекордно ниско ниво во однос на доларот, но претседателот на земјата, Реџеп Таип Ердоган ја отфрла загриженоста, велејќи им на Турците дека „ние го имаме нашиот Господ“. Ердоган го рече ова, поттикнувајќи ги Турците да ги продаваат доларите и златото, а да купуваат лири.
Тој вели дека ќе се спротивстави на притисоците од САД.
„Се водат повеќе кампањи. Не им обрнувајте внимание. Не заборавајте, ако тие ги имаат нивните долари, ние го имаме нашиот народ, нашиот Господ. Ние работиме напорно. Погледнете каде бевме пред 16 години, а каде сме сега“ – изјави Ердоган.
Турција планира да ги намали државните трошоци за 5,6 милијарди долари, со цел да ја зголеми довербата во националната валута, соопшти денеска турскиот министер за финансии и буџет, Берат Албајрак.
Падот на турската лира за 30 %, падот на берзата за 17 %, скок на каматните стапки на задолжување на државата во лири на 18 %, а тоа би можело да биде најава на економска криза.
Загриженост за состојбата со турската економија изрази и ММФ кои во длабина ја скенираат состојбата во земјата.
Американскиот претседател, Доналд Трамп кажа во јули дека САД ќе воведе големи санкции против Турција, но засега тоа не се случи.