Што ќе се случи со цената на пивото на светско ниво?

Добивај вести на Viber

Топлинските бранови и сушите од климатските промени ќе го намалат родот на јачменот, а со тоа и производството на пиво, сметаат научниците.

Јачменот е многу чувствителен на сушата и горештините и неговиот род ќе опадне доколку продолжат климатските промени, што ќе доведе до недостиг на пиво и раст на неговата цена, се наведува во студијата објавена во магазинот Nature Plants.

Само јачменот со најдобар квалитет (помалку од 20 отсто од вкупното глобално производство) се користи за пиво. Со остатокот се храни стоката.

Ако глобалното загревање продолжи, екстремните горештини и сушите ќе ги зафатат регионите во кои се одгледува јачмен барем еднаш годишно. Тоа ќе доведе до пад на производството на пиво за 16 отсто.

Цените во просек ќе се удвојат, се вели во студијата.

„Целта на оваа студија не е да ги поттикне луѓето денес што повеќе да пијат“ – вели Дабо Гван, професор по економија на климатските промени на Универзитетот Ист Англиа во Норвич.

Според најоптимистичното сценарио, со моменталното значително намалување на емисијата на стакленички гасови, глобалното производство на пиво би паднало за четири отсто, а цените би пораснале за 15 отсто.

Некои земји би биле посебно погодени, стои во студијата, вклучително европските земји, САД, Нов Зеланд и Австралија.

Најголеми светски извозници на јачмен се Австралија, Франција, Русија, Украина и Аргентина. Најголеми увозници се земји како Кина, Саудиска Арабија, Иран, Холандија, Белгија и Јапонија.