СИНДИКАТОТ НА ПОЖАРНИКАРИТЕ АПЕЛИРА: Внимавајте да не предизвикате пожар, се стоплува и сите се дома
Објавено во: Македонија 10 Април, 2020
Независниот синдикат на пожарникарите на Македонија ги повикува граѓаните, во услови на рестриктивна слобода на движење, во услови на борба со пандемијата и ангажираност во таа борба на интервентните човечки ресусрси со кои располага државата, со особена одговорност да се однесуваат кон можноста за предизвикување на пожар.
Ваквата претпазливост и овој јавен повик, велат од синдикатот, го упатуваат од следните причини.
- со зголемување на температурите на воздухот се зголемува можноста за предизвикување и брзо ширење на пожарите,
- со ограничување на движењето на самите вас - граѓаните кои сте нашиот најголем соработник и помагач во борбата против пожарите, се намалува можноста од вашата асистенција во заедничката борба со огнените стихии, но особенo со можноста правовремено да ни дојавите за пожарите што заедно со нашата брза интервенција се клучниот фактор за нивното сузбивање,
- со ограничување на движењето, зголемен е бројот на лица кои престојуваат во своите домови а со тоа и можноста за загрозување на животите на поголем број граѓани одеднаш што значи и помала можност за нас да го постигнеме ефектот што го посакуваме .
„Затоа во име на вашата безбедност, безбедноста на вашите најблиски и на сите нас кои сме дела од системот на вашата колективна заштита, апелираме да се воздржите од палење на ѓубриштата, контејнерите, отпадот, стрништата и со нагласена внимателност да рaкувате со сите средства и уреди кои се потенцијални причинители на пожарите“, нагласуваат од синдикатот на пожарникарите.
НСПМ со своето членство - пожарникарите, отсекогаш а особено во оваа исклучително тешка состојба со која се соочуваме, се со вас во својот полн состав со зголемен интензитет на приправност за интервенција.