„СИНИОТ ОКЕАН НА ЧАИР МУ ПРИПАЃА САМО НА АХМЕТИ“ - Груби еуфоричен од посетеноста на митингот во Чаир, Огнените незадоволни
Објавено во: Македонија 21 Март, 2023
Првиот вицепремиер Артан Груби на својот фејсбук профил објави фотографии од вчерашниот митинг на Демократската унија за интеграција во Чаир, локација која се смета за своевидна база односно упориште на фракцијата Огнени во таа партија.
На фотографиите се гледа дека салата е преполна, со голем број присутни членови и симпатизери на ДУИ.
„Синиот океан на Чаир му припаѓа само на Али Ахмети! Ве сакам многу“, напиша Груби на фејсбук заедно со објавените фотографии.
Фактор вчера пренесе детали од обраќањата на функционерите на ДУИ пред присутните во Чаир. Ахмети на митингот кажа дека е горд на функционерите на ДУИ во Владата, а Груби рече дека останува со подадена рака за обединување, при што сигурно се мислеше на Огнените.
Инаку, пред митингот Огнените обвинија дека Артан Груби вршел притисок врз членовите на ДУИ кои се вработени во администрацијата, дека мора да присуствуваат на овој партиски собир, со цел да покажат масовност.
Потоа груби пред телевизиски камери прашуваше дел од присутните дали тие се со сила донесени на митингот, на што тие одговараа дека тука дошле доброволно.