Скијачки клубови: Новиот претседател на СФМ е избран со фалсификат

Добивај вести на Viber

Во врска со изборите на ново раководство на Скијачката Федерација на Македонија (СФМ), згрозени од правното насилство со кое надлежните државни институции сакаат по секоја цена да наметнат свое решение за претседател, загрижени за угледот, интегритетот и спортската иднина на македонското скијање, ние, 16 скијачки клубови се обраќаме до сите надлежни институции со Барање да ги преиспитаат своите погрешни и правно спорни одлуки. Искрено жалиме што во Македонија станува правило изборите на раководни органи во спортските федерации да се редовно скандализирани. Тоа е последица на мешањето на политика во спортот, што резултира со девастиран спорт и задоволување на нечиј бизнис апетити и интереси. 

На легитимното редовно собрание одржано на 02.03.2021 едногласно за нов претседател на Скијачката Федерација на Македонија беше избран олимпиецот Дејан Пановски, еден од нашите најтрофејни и најуспешни скијачи со учество на две олимпијади и 179 меѓународни ФИС натпревари, поддржувач и вљубеник во спортот.         

Следниот ден, на 03.03.2021 започнува правното насилство за попречување на легитимниот избор на Дејан Пановски. Преку ноќ, се одржува наводно вонредно собрание, со иницијатива на осум редовни клуба доставена од Ски клубот „Полар“, преку Кирил Насков кој долги години работеше и како технички секретар во СФМ. Скандалот да биде уште поголем покрај фалсификувањето на документите за наводната иницијатива, покана и учество на вонредното собрание потпишана од  организаторите на ова вонредно собрание прават уште една манипулација, со која во името на најстариот и најреномираниот Скијачки клуб „Љуботен“ од Тетово, се појавуваат поединци со нов клуб кој лажно бил претставен за правен наследник на овој славен скијачки клуб. Покрај апсолутната нелегитимност на вонредното собрание на кое учествувале само 8 од вкупно 18 скијачки клубови, редовни членови на федерацијата, наводното вонредно собрание е одржано без да се испочитуваат законските и статутарни одредби за негово свикување.

И покрај сите овие нерегуларности Централниот Регистар врши упис на нелегитимното вонредно собрание и за нов претседател на Скијачката Федерација на Македонија го запишува Огњан Циговски. Ова лице e сопственик и директор на неколку коцкарници и обложувалници и нема допирна точка со спортското скијање. Но затоа пак стопанисува со ски центарот во Маврово и веројатно тоа му е главната препорака во политичките кругови за да биде инсталиран во Скијачката Федерација на Македонија. За сите овие незаконски дејствија покренати се кривични пријави до надлежното обвинителство и информирани се ФИС (Меѓународната скијачка федерација), ИБУ (Меѓународната биатлон федерација), МОК (Македонскиот олимписки комитет) и други надлежни институции во Македонија. На жалбата до Второстепената комисија при Централниот Регистар за поништување на овој скандалозен и незаконски упис на Огњан Циговски како претседател на СФМ, се потпишани 10 скијачки клубови. 

Зад изборот на Дејан Пановски стојат мнозинството на скијачки клубови, кои својата поддршка писмено ја испратија до сите меѓународни скијачки спортски организации, недвосмислено потврдувајќи дека за нив спортот е пред се’! Ги повикуваме надлежните државни институции уште еднаш да ги преиспитаат своите досегашни одлуки и конечно да се стават на страната правото, законите и спортот. Македонското скијање не е рулет и никогаш не може да биде! Ничии бизнис интереси не можат да бидат поважни од иднината на македонскиот спорт. Ние ќе ја водиме оваа спортска и правна битка до крај. Сметаме дека е наша обврска да го заштитиме спортското скијање од скандали кои ќе и нанесат долгорочна меѓународна штета на државата.