СКОПЈЕ ПОД ОПСАДА: Продолжува да им се суди на обвинетите од „Диво Насеље“
Објавено во: Македонија 11 Февруари, 2016
Кружење на полициски хеликоптери и силни безбедносни мерки на вториот ден од судењето на обвинетите од мајските кумановски напади.
Обвинетите како што е добро познато се товарат за кривичните дела тероризам и терористичка организација.
Образложувајќи го обвинителниот акт, јавниот обвинител Наум Пановски на почетокот на судскиот процес рече дека Обвинителството ќе докаже дека обвинетите биле учесници во судирот во Куманово, како и во нападот врз полициската станица Гошинце.
Според обвинението, дел од обвинетите на 21 април минатата година ја нападнале полициската станица Гошинце и го зеле целото оружје за логистичка поддршка.
Одбраната на почетокот на судскиот процес побара овој случај да го преземе Специјалното јавно обвинителство.
На 9 и на 10 мај минатата година во кумановската Дива населба вооружена група се судри со безбедносните сили. Во престрелката загинаа осум полицајци од специјалните и посебните единици на МВР, додека четириесетина беа тешко повредени. Убиени беа и десет лица од вооружената група.