Словенија, Хрватска, Србија со загрижувачка стапка на самоубиства, Македонија меѓу оние со најмала
Објавено во: Македонија 17 Јули, 2018
Македонија ја има една од најмалите стапки на самоубиства во Европа, покажуваат податоците на Евростат и на Заводот за статистика.
Евростат ги објави податоците за безмалку сите земји од Стариот континент и сите од ЕУ, каде што лидер е Литванија со 30,28 самоубиства на 100.000 жители. Следуваат Словенија со 20,72 самоубиство на 100.000 жители, Летонија и Унгарија со стапка од 19,34 и 19,03, Хрватска со 17, 32, Белгија со 16,85 , а потоа Естонија со 16,0.
Не постои графа за Македонија, но според нашите пресметки, ако се знае дека во истата година (2015-та) во нашата земја како што евидентира Заводот за статистика се случиле 114 самоубиства, се работи за 5,7 одземени животи по сопствена волја на 100.000 луѓе.
Од преостанатите земји од соседството Србија има стапка од 15,03 самоубиства на 100.000 жители, а Бугарија има стапка од 9,33.
2015-та година е една од годините кога Македонија има најмал број на вакви трагични случаи, а лани (2017-та) имаше најмалку од осамостојувањето, или вкупно 111, додека рекордот е 179 во 2004-та.
Најмалку самоубиства имало во Лихтенштајн (2,49), Кипар (4,45) и Грција (4,69). Според евиденцијата, Македонија следува по овие земји. Слободно може да се каже дека Грција и Македонија се најдобри на ова поле во земји со над еден милион жители.
Од поголемите земји Франција има стапка од 14,14, Германија со 11,67, Британија со 7,35 и Италија со 6,7.
Истата година во цела Европска унија се самоубиле 56.000, а по апсолутни бројки најмногу животот си го одзеле во Германија (10.166) и Франција (9.156).