Словенија радикално го зголеми надоместот за невработеност, Македонците ќе треба да го знаат јазикот
Објавено во: Економија 13 Март, 2019
Според предлогот за изменување и дополнување на Законот за организација на пазарот на трудот, Словенија го зголеми најнискиот надомест за невработеност од 350 евра бруто (275 евра нето) на околу 530 евра бруто (392 евра нето).
"Надоместокот беше низок и не беше променет од 2011. Во меѓувреме, се сменија минималните трошоци на живот и минималниот приход и поединецот кој останал без работа имаше тешкотии да опстане", изјави изјави министерот за труд, семејство, социјални работи и еднакви можности Ксенија Кламфер.
Сепак, наместо за овој надоместок работникот како досега да биде осигуран девет месеци по ред на едно работно место, тој ќе треба да мине барем 12 месеци во едно претпријатие со цел да се намалат злоупотребите.
Лицата постари од 55 години со најмалку 25 години стаж ќе го добиваат надоместокот дури 25 месеци.
За странците да го добиваат надоместокот ќе бидат потребни основни познавања на словенечкиот јазик (ниво А2) за влез во регистарот на невработени за државјани на трети земји. На крајот на 2018 година, околу 7600 државјани на трети земја, главно од БиХ, Косово, Северна Македонија и Србија, беа регистрирани во регистарот на невработени лица.