Снег во Македонија: Ова се патните правци каде треба да се внимава
Објавено во: Македонија 22 Март, 2018
Календарски пролета започна, но времето доживеа целосен пресврт во Македонија.
На неколку патни правци, особено во западна Македонија, снегот што од синоќа интензивно паѓа предизвика застои во сообраќајот.
Според информациите од АМСМ и ЈП Македонијапат од 06:20 часот е воведена забрана за движење на камиони на регионалниот пат Дебар-Маврово.
Забрана за сообраќај на камиони од 05:30 часот има и на магистралниот пат Гостивар – Кичево, преку планинскиот превој Стража.
Сообраќајот на другите државни патишта се одвива отежнато по влажни коловози. Снег врне кај Страцин, на Маврово, Стража, Буково, Ѓавато, Попова Шапка, Пресека и во Смојмирово.
Интензитетот на сообраќајот на патните правци надвор од градските средини е умерен. На граничните премини нема подолги задржувања за влез и за излез од државата. Оваа информација се однесува само за македонската страна на премините.
Од АМСМ апелираат на внимателно возење и прилагодување на брзината кон условите на патот.