СО 70 МИЛИОНИ ЕВРА КРЕДИТ ОД ЕБОР: Шилегов ќе го презентира системот на брз автобуски превоз во Скопје
Објавено во: Македонија 08 Јули, 2021
Скопје како еден од најзагадените градови во Европа, ќе стане првиот град на Западен Балкан кој ќе воведе систем на брз автобуски превоз (БРТ), рече градоначалникот Петре Шилегов на потпишувањето на договорот за кредитирање со ЕБОР во вредност од 70 милиони евра.
Денес е најавено презентирање на системот на БРТ а според најавата се предвидува воведување на приоритетни автобуски коридори со хибридни автобуси за побрз и пофреквентен јавен превоз.
Новиот систем на БРТ предвидува намалување на емисијата на јаглероден моноксид од над 95 отсто, на ПМ честичките за приближно 90 отсто и нитроген оксид и јаглероден диоксид за најмалку една четвртина.
-За граѓаните на Скопје ова е остварување на сонот после 40 години. Добиваме подобар транспортен систем согласно нашите потреби. Добиваме брз, безбеден и одржлив јавен транспорт, кој ќе биде атрактивен, и ќе овозможи намалување на сообраќајниот метеж и аерозагадувањето“, истакна Шилегов на прес-конференцијата кога беше потпишан договорот.