СО КАЛАШНИКОВ РАЗРЕШЕТАН УЧЕНИЧКИ АВТОБУС НА КОСОВО: Убиен возачот и двајца тинејџери, уште едно дете е во болница
Објавено во: Балкан 27 Ноември, 2021
Неидентификуван
напаѓач пукал во автобус со тинејџери во западно Косово при што се убиени три
лица, а уште едно дете е рането и веднаш е пренесено во болницата во Пеќ,
соопштија полицијата и медиумите.
Фадил Гаши, портпарол на полицијата во Пеќ, рече дека автобусот бил нападнат во Глоѓан, 90 километри западно од Приштина околу 18:00 часот. Возачот веднаш починал, а тројца тинејџери биле пренесени во болница каде двајца од нив починале.
Бесник Ибрај, од болничката единица за итни случаи во Пеќ, за Коха изјави дека третиот тинејџер е повреден и е во стабилна состојба.
Ветон Елшани, заменик-шеф на полицијата во Пеќ, рече дека еден маскиран вооружен напаѓач пукал со автоматска пушка калашников кон автобусот, во кој се превезувале осум тинејџери.
Елшани не го наведе мотивот за нападот, велејќи дека е прерано и дека тоа се истражува, но ја исклучи можноста дека станува збор за тероризам.
„Нема причина да се верува дека станува збор за терористички чин“, рече подоцна Елшани.
Министерот за внатрешни работи Џељаљ Свецла ја прекина посетата на соседна Албанија и се упати кон Глоѓан.
Претседателката Вјоса Османи го нарече нападот „шокантен“ и ги повика органите на редот да ги откријат сторителите што е можно побрзо.
„Нападот врз автобусот со ученици е удар за нашиот јавен ред и безбедност. Безбедноста на граѓаните е приоритет и нема да се повлечеме во исполнувањето на таквата мисија“, напиша Османи на својот профил на Фејсбук.
Премиерот Албин Курти рече дека полицијата се мобилизирала „во полн капацитет да истражи такво тешко кривично дело и да донесе правда“, пренесува Коха.
Извор и фото: Koha Net