Со новата методологија до целосното членство би биле потребни околу 10-15 години, анализа Милошоски

Добивај вести на Viber

Според пратеникот од ВМРО-ДПМНЕ и поранешен министер за надворешни работи Антонио Милошоски  со новата методологија од почетокот на преговорите до целосното членство би биле потребни околу 10-15 години. Тој на Фејсбук го коментира таканаречениот нон-пејпер изготвен од Франција. 

„Новата методологија за проширување на ЕУ, предложена од Франција, предвидува парцијално членство и 7 етапи при зачленувањето на Македонија, Србија, Албанија, Црна Гора, Косово и БиХ. Зачленувањето е предвидено како строг, постепено и спор процес, но со поконкретна поддршка во текот на целиот процес, преку делумен пристап до инструментите од заедничките ЕУ-проекти, а можен би бил и пристап до помал процент од структурните фондови. Етапите на постепеното зачленување се замислени како школски систем, односно не можете да учествувате во политиките на ЕУ од петата етапа, доколку не ги исполните одредниците за влез и учество во четвртата етапа, претходно третата етапа итн. Човековите права и слободи, владеењето на правото и правосудството остануваат темелни основи на процесот? чие исполнување е услов без кој не се може. Постепеното зачленување во ЕУ се предлага да биде повратен/реверзибилен процес кој ќе може, заради можно наведување во стандардите, да биде суспендиран, да бидат ускратени одредени фондови или да биде вратен на#самиот почеток. Полноправното членство останува опција и крајна цел, но со оваа методологија од почетокот на преговорите до целосното членство би биле потребни околу 10-15 години“, пишува Милошоски.

Францускиот претседател Емануел Макрон на македонскиот претседател Стево Пендаровски на средбата во Париз му рекол дека немал намера да нуди друга алтернатива за нас, освен членство во ЕУ. Сепак, неизвесно е дали на самитот во Загреб ќе има датум за Македонија.