„Со тие разговори се направи нов злочин“: Туфегџиќ за масакрот кај Смилковското Eзеро - само штета од прислушуваните разговори

Добивај вести на Viber

Адвокатот Владимир Туфегџиќ, кој го водеше истражниот процес за масакрот кај Смилковско Езеро, изрази сериозни обвинувања за злоупотреба на прислушуваните разговори што беа дел од јавниот проект поддржан од тогашниот лидер на СДСМ, Зоран Заев. 

Во интервју за „Претрес со Ландов“, Туфегџиќ тврди дека разговорите не само што не придонесоа за расветлување на случајот, туку предизвикаа ново страдање за семејствата на загинатите.

Според адвокатот, со објавувањето на прислушуваните разговори се направила класична злоупотреба, која имала катастрофални последици врз емоционалната состојба на семејствата на жртвите од убиствата кај Смилковско Езеро.

„Со тие разговори се направи нов злочин, овојпат врз семејствата на загинатите,“ рече тој, потенцирајќи дека објавените материјали довеле до дополнително страдање, наместо да донесат одговори или разрешување на случајот.

Туфегџиќ исто така ја критикуваше бомбастичната најава за прислушуваните разговори, каде што се тврдеше дека високи државни функционери биле директно инволвирани во убиствата кај Смилковско Езеро. Тој објасни дека разговорите, иако содржеле загриженост од тогашни функционери, немале никаква поврзаност со настанот.

„Да, имало разговори од функционери, но тие разговори немаат никаква врска со убиствата. Тие функционери барале одговори за тоа што точно се случило,“ изјави Туфегџиќ.

Според Туфегџиќ, семејствата на жртвите, кои веќе ја преживеале трагедијата на загубата, претрпеле нова емотивна болка како резултат на објавувањето на овие прислушувани разговори. Наместо да донесат олеснување или да ја разјаснат вистината, овие материјали создадоа уште поголемо страдање. 

„Овие разговори не донесоа никаква вистина или разрешување, туку само патење и страдање,“ нагласи адвокатот.

Фото: Вангел Тануровски