„Соломонска одлука“ на СДСМ и ДУИ: Ќе пуштаат оглас за заменик-директор за ревизија
Објавено во: Македонија 08 Ноември, 2019
СДСМ и ДУИ ќе објават оглас за заменик-директор на Државниот завод за ревизија и така ќе ја продолжат функционалноста на овој орган кој ја скенира работата на државните органи, јавните претпријатија, политичките партии и општините.
Ваквиот потег се должи само на тоа колку да се продолжи функционалноста на заводот, односно да има кој да додели плати и да ги потпише одлуките, во ситуација кога и натаму нема договор во собраниската Комисија за именување помеѓу коалиционите партнери за тоа кој да биде прв човек на Ревизијата.
Државниот завод за ревизија точно две години нема директор, а неодамна му заврши и мандатот на заменикот, по што се јавија стравувања кај вработените, синдикатите и невладините организации за неговата функционалност особено во периодот на предизборие.
СДСМ и ДУИ, како што дознава НОВА, доставиле до претседателот на Собранието Талат Џафери поднеле пред два дена барање да се објави оглас за избор на заменик – директор на оваа институција.
„Собранието треба да избере нов заменик на главниот државен ревизор поради истекот на мандатот на заменикот. Поради ова предлагаме Собранието да донесе одлука за објавување јавен оглас за избор на заменик на главниот државен ревизор“ пишува во предлог одлуката.
Огласот ќе трае 15 дена откако ќе биде објавен, а заменик-директорот не смее да биде член на партија ниту да членува во Управни одбори.