Помалите домашни фирми најчесто имаат партнери од регионов

Добивај вести на Viber

Малите и средните фирми од Северна Македонија најмногу извезуваат свои производи и услуги во регионов, информираат од ЕЕН- Македонија.

„Од нашите податоци со кои располагаме, можеме да забележиме дека најголема соработка компаниите од земјава имаат со фирмите од регионов, но и со Германија“ изјави професорот Виктор Стојмановски.

На денешната прес конференција во Стопанската Комора на Македонија беше презентирана  мобилната апликација „Ино Биз“. Оваа мобилна апликација е алатка преку која малите и средните претпријатија од земјава можат многу полесно да дојдат до информации од базата на ЕЕН (ENTERPRISE EUROPE NETWORK), информации со кои компаниите можат многу полесно да се вмрежат со компании од европскиот и светскиот пазар.

Целта на оваа алатка е зголемување на трансферот на технологии кај малите и средните претпријатија и да се зголемат научно истражувачките проекти.

Мобилната апликација е бесплатна и е достапна на две платформи.

Компаниите преку оваа алатка можат многу полесно, но и побрзо да дојдат до странски партнери, но исто така да се запознаат и со најновите информации кои ги имат или нудат светските компании, но исто така можат и преку оваа алатка да аплицираат и за грантови.

Мобилната апликација во моментов ја користат над 300 фирми од Северна Македонија.  Дел од овие компании преку настаните кои можат редовно да ги следат на апликацијата имаат земено учество на неколку интернационални настани.  Најголем број од фирмите кои ја користат „Ино Биз“ апликацијата се од Информатичко технолошката дејност.