Спасовски за Ачкоска: Со обвинител ќе прецизираме за кое дело ќе одговара

Добивај вести на Viber

Со обвинител ќе прецизираме за кое дело ќе одговара, но реакција за професорката Ачкоска мора да има, вели министерот за внатрешни работи, Оливер Спасовски. 

Тој ќе бара реакција од Јавното обвинителство по статусот на Фејсбук на пензионираната професорка од Филозофскиот факултет, Виолета Ачкоска, која објави дека средношколец бил отруен со дрога во пијалак, послужен во кафуле. Таа денес во полициска станица објасни дека нема информации за настанот, дека објавата ја направила откога за тоа ѝ кажале ученици, а сфатила дека направила грешка кога почнале да ја бараат новинарите, по што го избришала статусот. Спасовски денес ја потсети јавноста дека доколку некој има податоци за некое кривично дело, треба да ги сподели со истражните органи, а не на Фејсбук.

„Во врска со овој случај ние ќе поднесеме пријава до Јавното обвинителство и ќе бараме да има реакција од таму бидејќи не може во ниту еден момент да изнесуваме податоци и информации што предизвикуваат страв, неизвесност и паника во јавноста, без да се базираат на какви било факти и податоци. Ќе се консултираме со јавниот обвинител за да прецизираме за кое кривично дело ќе одговара, но мора да има реакција“, рече министерот Спасовски.

Тој апелираше сите да бидат одговорни за јавно изречените зборови, а посебно луѓето со интегритет и повика да не се шират шпекулации.

Професорката Виолета Ачкоска немала официјална информација дека гимназијалец бил отруен од друга која наводно му била подметната во пијалок во кафуле, туку такви муабети слушнала од деца.

Полицијата вчера попладне најостро ги демантираше лажните вести во врска со наводно пронајдени починати средношколци во Градскиот парк во Скопје, поради употреба на дрога, кои се ширеа по социјалните медиуми.