Спиро Ристовски: Членови на ВМРО-ДПМНЕ се незадоволни затоа што Силјановска го водеше пленумот
Објавено во: Македонија 19 Февруари, 2019
Спиро Ристовски, поранешниот министер за образование и наука, како и за труд и социјална политика, смета дека голем дел од партиското членство е незадоволно по убедливата победа на Гордана Силјановска Давкова на конвенцијата за избор на кандидат за претседател на Македонија затоа што таа своевремено беше лидер на професорскиот пленум кој покрена бунт против тогашната власт на ВМРО-ДПМНЕ.
„Состојбата е загрижувачка бидејќи не се среќни со овој избор. Се чудат, но и се чудам што наш кандидат за претседател стана лидер на некогашниот професорски пленум, без оглед кој во периодот на студентските протести бил во право, а кој не. Односот е двостран. Во партијата не е заборавен 'учинокот' на тој пленум. Реагираат, затоа што главното прашање е дали со овој кандидат партијата може да освои 550.000 гласови. Раководството веројатно смета дека со стабилно гласачко тело и со некаква додадена вредност ќе стигне до резултат. Легитимно е прашањето на членството - со какви математики е направена таа пресметка?“, вели Ристовски во разговор за Дојче Веле.
Тој додава дека раководството на најголемата опозициска партија треба да биде отворена и за различните ставови и да го обедини членството.
- Став од оној на раководството, веднаш се соочува со етикетирање, девалвирање, жигосување и натамошно изолирање од партијата. А сето ова се случува токму во време кога на ВМРО-ДПМНЕ му е потребно единство постигнато низ разговори, посветеност на членството, и обединување. И по овие мои изјави очекувам да има лавина од фејсбук-статуси на поединци, коишто и претходно ме жигосуваа затоа што имам различен став - тврди Ристовски