Србија Карго ни изнајми четири електрични локомотиви
Објавено во: Економија 25 Септември, 2024
Акционерското друштво за железнички транспорт на стоки Србија Карго денеска соопшти дека склучило договор со Железницата на Северна Македонија - Транспорт, на која ќе и изнајми четири електрични локомотиви од серијата 461.
Србија Карго наведува дека овој договор носи бројни придобивки, бидејќи значително ќе го забрза протокот на стоки од грчките пристаништа, како Солун и Пиреја, преку Македонија и Србија, што ќе овозможи побрз транзит кон Европската унија.
„Се очекува оваа иницијатива значително да придонесе за зголемување на приходите на двете железнички компании и подобрување на нивните деловни процеси“, се додава во соопштението.
Се проценува дека закупот на дополнителни локомотиви на македонската компанија ќе овозможи зголемување на капацитетот на транзитниот сообраќај на Коридорот 10, кој делумно минува низ Србија.
„Србија Карго генерира дополнителен приход со изнајмување достапни локомотиви, додека Железниците на Северна Македонија со овој закуп обезбедува поефикасен транспорт на транзитни возови, вклучително и оние на големите компании како Коско, обезбедувајќи континуитет на сообраќајот низ Србија“, се вели во соопштението. .