СРЕДБАТА ВО ОХРИД НЕ БЕШЕ ДЕНОТ Д: „Паднаа во вода надежите на српската опозиција дека Вучиќ ќе потпише нешто, па ќе го сменат
Објавено во: Балкан 19 Март, 2023
Претседателот на
Социјалдемократската партија на Србија (СДП), Расим Љајиќ, денеска оцени дека
средбата меѓу претседателот Александар Вучиќ и премиерот на Косово Албин Курти
не била „ден Д“, бидејќи е постигнат договор за спроведување на она што
претходно се договорија.
- Во Охрид беше постигнат договор дополнително да се договара и спроведе она што го договоривме претходно. Вака кусо може да се опише исходот од вчерашните преговори меѓу Вучиќ и Курти. Затоа, не се случи никаков „ден“ – изјави Љајиќ.
Тој истакна дека ова е процес за кој дефинитивно ќе биде потребно време.
- Нема да заврши оваа година, а се осмелувам да кажам, ниту следната година. Постојат три причини за ваквата прогноза. Како прво, позициите на Белград и Приштина во однос на повеќедеценискиот проблем се толку далеку што тешко дека може да има брзо и одржливо решение. Второ, општествата и голем дел од јавноста, ниту во Србија, ниту во Косово, не се подготвени за голем исчекор и болен компромис, кој е потребен за конечно решение. Трето, меѓународната заедница сака договор, но не знае како да го постигне и се плашам дека не ги разбира ограничувањата споменати погоре - објасни Љајиќ и додаде дека „ова ќе биде почеток на маратон наместо некои спринтерски настани“.
Охридската средба ќе се памети само по должината на траењето, а не и по исходот. Пропаднаа и надежите на добар дел од десничарската опозиција дека Вучиќ ќе потпише нешто и дека тоа ќе им даде „гориво“ за негово соборување.
фото: EPA