Статистика на Чулев за (не)почитување на мерките

Добивај вести на Viber

Досега на 2.405 луѓе им се издадени решенија за изолација, а 9.793 потпишале изјава за самоизолација, оваа статистика ја изнесе министерот за внатрешни работи, Наќе Чулев на својот профил на Фексбук.

-Во изминатиот период констатирани се 10 прекршувања на решенијата за изолација и 157 прекршувања на изјавите за самоизолација. Во оваа насока поднесени се вкупно 134 кривични пријави до основното јавно обвинителство, напиша Чулев.

Во однос на статистика која се однесува на почитување на мерките за ограничување на движењето на граѓаните од нивното воведување, па се до денес, министерот наведува:

-Вкупно 1322 лица не ја почитувале мерката за ограничување на движењето, 62 лица од нив се на возраст до 18 години и 42 лица се на возраст над 67 години
Приведени се вкупно 519 лица, опоменати се 223 лица, а за останатите земени се податоци и ќе следуваат дополнителни мерки. Најголем дел од лицата се на територијата на СВР Скопје. До основното јавно обвинителство до сега поднесени се вкупно 483 кривични пријави и 73 известувања

Од страна на Секторот за компјутерски криминал и дигитална форензика, како што наведува Чулев, поднесена е една кривична пријава и 25 известувања до основното јавно обвинителство кои се однесуваат на говор на омраза поврзан со COVID19. Во истата објава, министерот изрази благодарност до граѓаните кои го почитуваат полицискиот час, воведен поради коронавирусот.