Стоп за бурките во Мароко
Објавено во: Свет 10 Јануари, 2017
Maроканските власти го забранија производството и продажбата на бурка, пренесе Франс прес.
Министерството за внатрешни работи испрати писмо до своите вработени одговорни за трговијата во градовите, во кое им се наредува од оваа недела да не дозволуваат повеќе производство и продажба на бурка, објавија локалните медиуми.
Во некои трговски населби на Казабланка, економската престолнина на земјата, вработените од Министерството за внатрешни работи ги информирале вчера трговците за новото решение. Во градот Тарудант висок чиновник им наредил на трговците, кои произведуваат и продаваат бурка, да ги ликвидираат резервите до 48 часа и да ја прекинат секоја комерцијална активност, вклучувајќи ја оваа облека.
Преземени се мерки и за забрана на увозот на бурка во Мароко.
Според марокански медиуми бурката е забранета од безбедносни причини. Се наведува дека таа многу пати е користена од криминалци.