Стопанствениците од Визбегово втор ден на протест, бараат Шилегов да побрза заради дистрибуцијата
Објавено во: Економија 19 Јуни, 2019
Стопанствениците од погоните од индустриската зона во Визбегово денеска излегоа повторно на протест и побараа од Петре Шилегов, градоначалникот на Скопје, побргу да го реконструира мостот, бидејќи функционирањето на една лента од Јадранската магистрала веќе долго време создава метеж и ја прави нефункционална дистрибуцијата.
Протестот се одржа на потегот од Словенечка, во правец кон Скопје, до крстосницата Момин Поток, каде што се врши реконструкцијата на мостот. Од здужението на зоната Визбегово, која е една од најголемите во Македонија, велат дека ситуацијата е два месеци непроменета а тоа е премногу долго за едно стопанство, кое во овој случај не може да функционира.
– Со излегувањето на протест сакавме да го искажеме нашето незадоволство од предолгата реконструкција на мостот. Не се работи ефективно и токму тоа е причината што реконструкцијата трае предолго. А во индустриската зона на Визбегово функционираат 300 компании и има над пет илјади вработени. Некои, како што се дистрибутивните компании, имаат потреба да излегуваат со возила по неколкупати во денот, а во сообраќајните колони заглавуваат и по половина час, а тоа е огромна загуба. Ова веќе е неподносливо и токму затоа излеговме на протест, велат од Здружението на компании од индустриската зона Визбегово.
Од Градот Скопје вчера реагираа дека реконструкцијата на овој мост е планирано да се изврши во рок од 60 дена. Рокот на изведба на оваа реконструкција во согласност со договорот и проектната документација е до 2 јули годинава, нагласуваат градските власти.