Стотици куќи под вода во најголемиот град во Австралија, надлежните велат дека има опасност од нови поплави (ФОТО)
Објавено во: Свет 05 Јули, 2022
Стотици домови се поплавени во и околу најголемиот град во Австралија, Сиднеј во поплавите кои погодија околу 50.000 луѓе, соопштија официјални лица.
Службите за итни случаи спасија околу 100 луѓе заробени во автомобили на поплавени патишта или во домови под вода во областа Сиднеј во текот на ноќта, изјави шефот на службата за итни случаи, Ешли Саливан.
Деновите на бурни дождови доведоа до кршење на браните и излевање на реките. Ова е четврта закана од поплави во последните 16 месеци во делови од градот кој има околу пет милиони жители. Премиерот на Нов Јужен Велс, Доминик Перотет, изјави дека биле дадени наредби за евакуација на околу 50.000 луѓе.
- Ситуацијата се уште е тешка. Ве молам, не се опуштајте, каде и да сте. Бидете внимателни кога возите. Низ нашата држава се уште постои голема опасност од нови поплави - рече тој.
Државната влада на Нов Јужен Велс прогласи катастрофа во 23 области на локалната самоуправа во текот на ноќта, активирајќи ја финансиската помош од федералната влада за жртвите од поплавите.
Фото: EPA/ JEREMY PIPER