СУДОТ МОЛЧИ: Ќе има ли притвор и одземање на пасоши на осомничените во „Трезор“?

Добивај вести на Viber

Засега само молк од Кривичниот суд по барањата на СЈО за одредување на мерки за претпазливост на осомничените лица во случајот „Трезор“.

Како што вчера СЈО соопшти и најави така и поднесе предлог за преземање на мерки на претпазливост, за едно лице притвор и одземање на пасошот за три лица, сите осомничени во случајот „Трезор” .

Трезор е шесттата „Т“ истрага на СЈО која се  однесува на економски криминал кој произлегува од прислушуваните материјали. Обвинителката Фатиме Фетаи на прес-конференција информира дека овој предмет се однесува на груба злоупотреба на средствата од буџетот на Република Македонија за што се осомничени три раководни лица во УБK и едно раководно лице во МВР во врска со набавка на електронскокомуникациска опрема и обука за нејзино користење од фирма од Велика Британија за потребите на Петтата управа при УБK.

Кои се осомничените во „Трезор“?

Поранешниот директор на УБК, Сашо Мијалков, поранешниот началникот на петтата управа Горан Грујовски, шефот на кабинетот на Мијалков, Тони Јакимовски и бившиот помошник министер во МВР и член на Управен одбор на Телеком Небојша Стајковиќ се осомничените во случајот Трезор, дознава НОВА од судски извори.

Првите тројца осомничени, Мијалков, Јакимовски и Грујовски, во 2010 година отпатувале во Лондон и договориле набавка на опрема за пресретнување на комуникациите и обука за користење на опремата за потребите на Петтата управа. Но, наместо набавката да оди директно преку Министерството, осомничените функционери ја вклучиле и компанијата „Финзи“ како застапник на МВР.

„Финзи“ е компанија во сопственост на фирма од САД, додека фирмата од САД е поседувана од фирма во Кипар. Прв директор на оваа фирма е Владислав Стајковиќ, брат на Небојша Стајковиќ, последен беше Коста Крпач, сведокот на СЈО.