Сведочењето на Нинџа драматично, но никој не му верува

Добивај вести на Viber

Правници тврдат дека сведочењето на Александар Василевски Нинџа како обвинет за упадот во Собранието на 27 април на вчерашното судско рочиште не треба да се земе здраво за готово, со оглед на неговото досие и минат труд и дека неговите искази треба дополнително да се проверат и да се поткрепат со поубедливи докази.

Најдраматичен белег од сведочењето остави неговото тврдење дека дента на 27 април пред да се упати во Собранието бил во палатата „Христо Татарчев“, односно во партиското седиште на ВМРО-ДПМНЕ за да се види со Сашо Мијалков, но всушност на осмиот спрат имало „штаб“. Истиоот го сочинувале, според Нинџа, Билјана Бришковска, Спиро Ристовски, Митко Чавков, Миле Јанакиески и Кирил Божиновски, кои ги слушал како даваат инструкции по телефон и го координираат упадот на толпата.

„Има многу нејасни работи. Како од толкава партиска машинерија во ВМРО-ДПМНЕ, во тој драматичен ден, покрај сега притворените (Чавков, Јанакиески, Божиновски) во штабот на партијата тој ги видел само Билјана Бришковска Бошковски и Спиро Ристовски? Зошто останал таму, ако таму не го нашол Сашо Мијалков, лицето кое го повикало во 'базата'? Зошто и хотелот 'Мериот' бил база на таков профил на луѓе? Каква соработка имал Василевски со поранешниот директор на УБК, Мијалков, ако наредбите ги примал од Грујевски и Бошкоски. Како успеал точно да утврди со кого разговарале присутните во партискиот штаб?“, се дел од дилемите кои правниците ги поставија за Дојче Веле за кои сметаат дека не е обезбеден одговор.

За нив е и „многу симптоматичен“ и фактот што Василевски во исказот ги посочува токму Бришковска и Ристовски, двајца од потписниците на писмото што неодамна го обелодени поранешниот вицепремиер, Владимир Пешевски, а кои јавно повикаа на помирување и поддршка на осумте независни пратеници и на интегративните процеси на Македонија.