Тачи: Со поголемо задоволство би седнал на маса со ѓавол отколку со Александар Вучиќ

Добивај вести на Viber

Koсовскиот претседател, Хашим Тачи, пред продолжението на дијалогот со Србија изјави дека попрво би водел дијалог со ѓаволот отколку со српскиот колега, Александар Вучиќ.

За приштинската агенција „Косовапрес“, тој ги оцени како тешки состаноците кои ги има со Вучиќ.

Вели дека Вучиќ е тежок соговорник и истовремено оптоварен. 

„Можам да кажам дека со поголемо задоволство би седнал на маса со еден ѓавол отколку со Александар Вучиќ затоа што тој со сиот свој потенцијал, сиот арсенал на Србија работи на растурање на Косово како држава. Секако дека ќе го издржам тоа, но тоа не е доволно во соочувањето со Србија“, изјави Тачи.

Тој додава дека на утрешниот состанок во Брисел не може да дојде до договор и дека во неговата финализација ќе учествува целиот политички спектар.

Вучиќ и Тачи утре ќе остварат средба во Брисел на највисоко ниво и со посредство на шефицата на европската дипломатија Федерика Могерини, соопшти Службата за надворешни работи на ЕУ.

Се очекува тие да ја потврдат нивната подготвеност во интензивирање на напорите да постигнат правно обврзувачки договор за нормализација на односите меѓу двете земји. 

Односите меѓу двете земји се вложени откако Косово воведе санкции за српски производи. 

По одлуката на косовската Влада да ги зголеми царините за производи од Србија и Босна и Херцеговина за десет отсто, Европската комисија денеска побара итно објаснување и повлекување на мерката, јави дописничката на МИА од Брисел.