ТЕ-ТО останува најголем даночен должник: Кој лани избрза со државната помош и одложувањето на долгот?

Добивај вести на Viber

Како после една година се сфати дека нема правна основа за да се додели државната помош за Друштвото за производство на електрична и топлинска енергија ТЕ-ТО? Откако Владатa соопшти дека еднострано ќе го раскине договорот за помошта, Фактор побара информации за тоа зошто се случува ова, кој бил проблемот и како тоа станало јасно после толку време. Од Владата велат дека помошта била дадена, но не се реализирала затоа што постоела неусогласеност на Законот за данок на добивка и Законот за контрола на државна помош. Сепак други детали не се откриваат. Владата одлучи да и додели државна помош на ТЕ-ТО во ноември 2019 година. Тогаш беше обајвено дека државната помош е во форма на одложување на даночниот долг на компанијата во рок од 9 години. Единственото образложение зошто се прави тоа беше дека ТЕ-ТО е единствен објект кој произведува електрична енергија од природен гас, не влијае на загадувањето, придонесува за поголем БДП на државата како и за подобрување на енергетската сигурност.

„Оваа помош е доделена согласно Законот за контрола на државна помош, а попретходно добиено решение од Комисија за заштита на конкуренцијата за дозволеност и основаност на државна помош. Помошта беше дадена, но не се реализира зашто се констатира оти постои неусоглеснот на Законот за данок на добивка и Законот за контрола на државна помош. За да биде појасно, државата не даваше парична помош туку сакаше да им овозможи одложено плаќање на даночна обврска во период од 9 години, во висина од околу 1,5 милиони евра. Обврската произлезе откако компанијата прикажа добивка за 2018, која е фиктивна на основ на отпишани побарувања кон доверители врз основа на планот за реорганизација во стечајна постапка донесен од Основен суд Скопје 2, стои во одговорот од Владата сега.

Потоа усно за Фактор објаснија дека тие 1,5 милиони евра се акамти ама не објаснија зошто ги потенцираат сега. Во време на одлуката за помошта ТЕ-ТО должеше данок на добивка во вкупна вредност од 16 милиони евра. Тогаш од компанијата изјавија дека по 9 години целосно ќе го платат данокот. Моментно, според последната листа на должници која ја објавува Управата за јавни приходи ТЕ-ТО по основа на данок на добивка должи над 13 милиони евра. Оваа компанија е прва на листата должници.

Инаку во Извештајот на Комисијата за заштита на конкуренцијата за минатата година кој веќе е испратен во Собранието државната помош за ТЕ-ТО е евидентирана. Фактор веќе пишуваше дека во овој извештај стои дека когенеративната централа ТЕ-ТО Скопје лани добила државна помош од Владата во висина од 15.645.000 евра за одложено плаќање на данок. 

Даночната обврска на ТЕ-ТО чие плаќање беше одложено беше по основ на данок на добивка, обврска која де факто не постоеше, односно не е реализирана во компанијата, туку е настаната фиктивно по основ на отпишани обврски врз основа на Планот за реорганизација, одобрен и усвоен со судска одлука од 2018 година. Лани од Владата велеа дека имајќи го предвид фактот дека во моментов ТЕ-ТО АД Скопје има финансиски потешкотии, практично не е во можност да го плати таквиот данок на добивка, која добивка реално и не постои, евентуалното пристапување кон присилна наплата на тој данок на добивка, не само што ќе ја оневозможи реорганизацијата на компанијата, туку сосема извесно е дека ќе доведе до отворање на стечајна постапка над истата и пропаѓање на Планот за реорганизација, потег што предизвика многу нејаснотии и реакции, особено што тогаш компанијата беш и под истрага за лажен стечај.

А.Т.