Телохранителот на Бин Ладен со години прима социјално во Германија
Објавено во: Свет 24 Април, 2018
Поранешниот телохранител на убиенот лидер на Ал Каеда, Осама бин Ладен веќе со години со своето семејство живее во Бохум и прима социјална помош, затоа што германскиот суд одлучил дека не смее да биде протеран во родниот Тунис, објавија германските медиуми.
Партијата Алтернативна за Германија (АфД) поднела барање до регионалната влада на Северна Рајна-Вестфалија за лицето именувано, од безбедносни причини само како Сами А. Таа соопшти дека Сами А. месечно прима повеќе од илјада евра државна помош, а на ова треба да се додадат и околу 150 евра по дете и други форми на помош.
Тунижанецот Сами А. од 1997 година живее во Германија и се смета за опасна особа тој е под постојан надзор и секојдневно мора да се пријавува во полиција, пренесе Би-би-си.
Се тврди дека во 2012 година еден германски суд одлучил дека Сами А. не може да биде протеран во Тунис, бидејќи таму му се заканува мачење.
Сами А. пристигнал во Германија на студии, но од 1999 година неколку години престојувал во џихадистичките кампови во Авганистан, каде што напредувал до позиција како еден од телохранителите на терористичкиот лидер Осама бин Ладен.
„Германскиот закон за азил тука се злоупотребува до максимум - ние треба од даночните пари да финансираме еден терорист, поради тоа што не смееме да го протераме“- изјави за германскиот дневен весник Билд, демохристијанскиот политичар Екхарт Реберг.
Се наведува дека градските власти во Бохум во неколку наврати се обиделе да ја укинат дозволата за престој на Сами А., но секој пат одлука морала да биде повлечена поради пресудата во корист на Тунискиот државјанин кој во меѓувреме добил четири деца.