ТЕМЕНУГОВА ЗА ФАКТОР: Недолична и недозволива изјава на Премиерот
Објавено во: Македонија 14 Август, 2019
Изјавата на премиерот е недолична и недозволива, коментира за Фактор поранешниот новинар и уредник, а сегашен експерт за медиуми и комуникации, Александра Теменугова. Таа посочува дека, посебно делот каде премиерот навредува новинар, и дека по ниту еден основ не го оправдува Заев, но дека го разбира моментот на нервоза и притисок.
„Малку повеќе од хипокризија е дека истиот премиер пред две и пол години недвосмислено ја поддржа инклузијата на истите тие групи, кои со години беа маргинализирани. Не може да се декларирате дека ќе правите „Едно општество за сите“, а од друга страна да го јакнете стереотипизирањето. Па, погледнете што се случи последниве 12 часа по изјавата. Видете само колку хомофоби се осилија. Класичен пример дека говорот на јавните личности диктира јавен наратив и ниво на политичка култура“, истакнува Теменугова.
Таа како експерт за комуникации и медиуми смета дека е пострашен моментот на навреда кон новинар, па макар бил и „суетен“.
„Ако премиер осудува кој било новинар, особено ако тој/таа пишува за сериозни сомненија за висока корупција, може да значи порака за обесхрабрување на колегите да отвораат вакви случаи“, потенцира Теменугова и истакнува дека премиерот и се извини на ЛГБТ заедницата, но не и на новинарската заедница за етикетирање на новинар.
Теменугова за Фактор вели дека треба да се насочи притисокот кон што поскоро расветлување на случајот кој ни ја тресе државата, а не да се занимаваме со несреќните изјави на премиерот.Н.М.