Теодоракис: Да го спречиме походот на Турците и да им го покажеме патот кон Европа на соседите
Објавено во: Балкан 19 Јуни, 2018
Лидерот на партијата Река, Ставрос Теодоракис во интервју за информативниот портал „Иефимерида“ изјави дека договорот има слабости, но во ова време е корисен за да го спречат походот на Турците и да им го покажат патот кон Европа на соседите.
„Треба да ги затвориме малите фронтови и да се занимаваме со фронтот од исток. Турците ги модернизираат аеродромите во Скопје и Охрид. Ова е бизнис договор. А имаат и воена цел. Да добијат воздушна воена база на север од нас. Тоа е нивни стар стремеж. Ќе им дозволиме? Постојано даваат пари за џамии и клиники во оддалечени области? Ќе им дозволиме? Единствениот начин да го спречиме походот на Турците на Западен Балкан е да им помогне на нашите соседи да се насочат кон Европа. Ако ние им го затвориме патот, тогаш исламскиот лак ќе се прошири“- вели Теодоракис.
Како што јави дописничката на МИА од Атина, првиот човек на Река смета дека доколку владата го послушала нивниот предлог за формирање Совет за национална безбедност, тогаш Грција ќе добиела подобар договор.
„Моето мислење е дека требаше да инсистираме на „граѓани на Северна Македонија“. Ова, мислам дека е главната слаба точка на договорот“- вели лидерот на Река.
На прашањето како гледа на промените на политичката сцена што ги носи потпишувањето на договорот, Теодоракис вели дека не гледа промени, затоа што СИРИЗА и Независни Грци се се уште на власт, иако со еден пратеник помалку и додава дека ситуацијата ќе остане таква „се додека Ципрас не реши да одржи избори“.