„ТЕТЕКС“ ИМА ВАЖНА ВЕСТ ЗА СВОИТЕ АКЦИОНЕРИ - еве на колку пари тие можат да се надеваат
Објавено во: Финансии 05 Јуни, 2023
Комбинатот од Тетово има важна вест за своите акционери.
Тетекс АД Тетово им соопштува на акционерите дека од денес, 5.јуни 2023, започнува со исплата на дивидендата, согласно одлуката на Собранието на акционери од 26.04.2023.
„Се замолуваат акционерите кои не доставиле ТРС - трансакциона сметка за исплата, истата да ја достават на e-mail zarko@teteks.com.mk или во Тетекс АД Тетово“, се вели во објавата испратена до Македонската берза.
Како што веќе пишуваше Фактор, од целата добивка дури 67 отсто односно 740.800 евра ќе бидат наменети за распределба на дивиденда на неговите акционери. Станува збор за повеќе од 1.000 домашни физички лица. Тројца меѓу нив ќе поделат околу 20 отсто од дивидендата, а тоа се законските наследници на Глигорие Гоговски односно членовите на неговото семејство. Нето износот на дивиденда по акција за домашно физичко лице е 100 денари.
Нешто повеќе од 250.000 евра ќе останат како нераспределена добивка, а околу 55.000 евра ќе одат во законски резерви на друштвото.
„Тетекс“ е компанија која во континуитет дели дивиденда на своите акционери. Лани поделија износ што е речиси идентичен на тоа што ќе го добијат годинава. Најдобра дивиденда компанијата подели во 2020 година во време на корона кризата. Тогаш дивидендата по акција изнесуваше 220 денари.