ТЕЖОК УДАР ЗА МАКЕДОНИЈА: Познато колку милиони ќе изгубат „Макстил“, „Арчелор Митал“, „ИГМ Трејд“, ФЗЦ „11 Октомври“ и „Металопромет“

Добивај вести на Viber

Стопанската комора на Македонија ги објави ефектите од објавените мерки на Европската комисија за ограничување на увозот на челични производи и во прашање се милионски загуби посебно за секој од македонските комбинати „Макстил“, „Арчелор Митал“, „ИГМ Трејд“, ФЗЦ „11 октомври“ и „Металопромет“ во периодот од три години додека траат ограничените квоти, по кои се воведува царина од 25 отсто.

„Макстил“ ќе загуби 78 милиони евра за непродадените лимови, а „Арчелор Митал“ ќе пропушти заработка од 48 милиони евра.  „ИГМ Трејд“, ФЗЦ „11 октомври“ и „Металопромет“ заедно би останале без 45 милиони евра за непродадени цевки.

За производителот за топловалани дебели лимови „Макстил“ е предвидена глобална квота, базирана на испораките во ЕУ во периодот 2015-2017 година,  од која кога ќе се изземат определените максимуми за Украина, Јужна Кореја, Русија и Индија, останува количина од 1,2 милиони тони за сите останати земји. Финансиските реперкусии само од нереализираната додадена вредност  би биле 25,0 милиони евра,  односно 78,0 милиони евра по полната продажна цена на лимовите.

За производителот на ладновалани, пластифицирани и поцинкувани лимови „Арчелор Митал“, кој од скоро има нов сопственик, е предвидена национална квота за пластифицираните лимови и новина е што е предвидена глобална квота за ладноваланите лимови. Во сегментот на пластифицирани и поцинкувани лимови се очекува намалено производство за околу 11.000 тони за цело времетраење на мерките, вкупна изгубена продажба за овој сегмент 24 милиони евра, со тоа што намаленото производство  би влијаело на зголемување на фиксните трошоци по тон, а со тоа и на целокупната профитабилност и рентабилност на производството. Во сегментот на ладновалани лимови загубата би била 24 милиони евра.

Производителите на челични цевки „ИГМ Трејд“, ФЗЦ „11 Октомври“ и „Металопромет“, за кои се предвидени национални квоти базирани на испораки во периодот 2015-2017 година и кои 2018 година ќе ја завршат со пласман над тој тригодишен просек, би имале квота помала за цца 70.000 тони, што би претставувало намалување на приходите за цца 45,0 милиони евра.н Производителите на метални цевки поради истрошените квоти од времените мерки кон крајот на минатата година веќе почнаа со редуцирање на  производството.

Покрај заштитните мерки на Европската унија за ограничување на увоз на челични производи од Република Македонија, производителите на метални цевки дополнително се оптоварени и со  антидампинг постапка за увозот на заварени цевки, цевки и шупливи профили од квадратен или правоаголен пресек од железо, којашто во моментот е во тек.