Трамп размислува да ја покани Русија на следниот самит на Г-7
Објавено во: Свет 25 Август, 2019
Претседателот на САД, Доналд Трамп, изјави во Бијариц дека е „можно“ тој да ја покани Русија да се врати на годишниот самит на индустријализираните земји следната година кога е домаќин на самитот на Г-7.
Во изјавата за време на работниот појадок со британскиот премиер Борис Џонсон на маргините на митингот Г-7 во Бијариц, Франција, Трамп рече дека размислува да испрати повик до рускиот претседател, Владимир Путин.
Русија беше член на групата тогаш наречена Група Осум, но повеќето земји учеснички ја отфрлија Русија во 2014 година, поради Украина.
Европските земји инсистираат на тоа дека Русија прво треба да ги спроведе мировните договори во Минск пред да му биде дозволено повторно да се приклучи на групата. Трамп не кажа под кои критериуми повторно ќе ја покани Русија да учествува на годишните самити.
Други лидери, вклучително и британскиот премиер Борис Џонсон, се обидуваат да го убедат Трамп да се откаже од трговската војна со Кина и другите земји, бидејќи тие веруваат дека тоа придонесува за слабеење на светската економија, пренесува АП.