Трамп влезе во историјата: Стана првиот американски претседател кој два пати беше отповикан
Објавено во: Свет 13 Јануари, 2021
Мнозинството од американскиот Претставнички дом гласаше за импичмент на претседателот Доналд Трамп. Со ова тој влезе во историјата како единствен претседател за кој Долниот дом на Конгресот изгласал отповикување во текот на неговиот мандат.
„За“ гласаа 221 пратеник од Демократската партија и дури 10 републиканци, иако очекувањата беа дека ќе гласаат помалку. „Против“ гласаа 197.
Инаку малку е веројатно дека сега Сенатот каде продолжува постапката, ќе го отповика Трамп со оглед дека му преостануваат уште осум дена од мандатот, како и тоа што Горниот дом сè уште е под контрола на републиканското мнозинство.
Трамп е обвинет дека го поттикнал бунтот на демонстрантите кои на 6 јануари упаднаа во зградата на конгресот и го „окупираа“ околу 4 часа, во период кога таму траеше седницата со која официјално се потврди победата на демократот Џо Бајден на изборите на 3 ноември 2020.
Првиот импичмент за Трамп за кој гласаше Претставничкиот дом беше во декември 2019.